CNN: Yüksək rütbəli türk rəsmisi deyir ki, Ukrayna-Rusiya danışıqları “gözləniləndən daha müsbət” olub
Ukrayna və Rusiya arasında mayın 16-da İstanbulda keçirilən danışıqlar “gözləniləndən daha müsbət” olub və tərəflər “bir-birini ittiham etməyiblər”. GAXA-nın məlumatına görə, bu barədə CNN-ə adının açıqlanmasını istəməyən bir türk rəsmisi bildirib.
Türkiyəli mənbə təsdiqləyib ki, Rusiya danışıqlarda “atəşkəs məsələsinin müzakirəsi kontekstində” Ukrayna tərəfinin qoşunlarını nəzarətində olan ərazilərdən çıxarması tələbini qaldırıb. Söhbət Donetsk, Luqansk, Zaporojya və Xerson vilayətlərindən gedir.
"Vəziyyət dalana dirənəndə biz üç kateqoriyanı - uşaqlar, mülki şəxslər və əsgərləri əhatə edən məhbus mübadiləsini təklif etdik. Ukrayna tərəfi bununla razılaşdı", - mənbə CNN-ə bildirib.
O, Rusiya nümayəndə heyətinin "ukraynalılarla müqayisədə məsləhətləşmələrə daha az meylli olduğunu" deyib.
"Bunlar iki fərqli məsələni müzakirə etmək üçün danışıqlar masası arxasına keçən iki tərəfdir. Lakin onların İstanbula gəlmələri onların həll yolu tapmaq ehtiyacı kimi qəbul edilə bilər", - rəsmi hesab edir.
Xatırlatmaq istərdik ki, mayın 16-da İstanbulda üç ildən artıq müddətdə ilk dəfə olaraq Rusiya ilə Ukrayna arasında birbaşa danışıqlar aparılıb.
Danışıqlardan sonra Ukraynanın müdafiə naziri Rustem Umerov bildirib ki, tərəflər atəşkəs razılaşması və humanitar məsələləri, eləcə də rəhbərlik səviyyəsində mümkün görüşü müzakirə ediblər.
GAXA.ge
